ALMUDENA
HOSPIDO QUINTANA

Almudena Hospido Quintana (Santiago de Compostela, 1976) é Catedrática de Enxeñaría Química na ETSE, membro do grupo de investigación en Biotecnoloxía Ambiental (BIOGROUP, GI-1613) e investigadora do centro CRETUS. Enxeñeira Química (1999) e doutora en Enxeñaría Química e Ambiental (2005, Premio Extraordinario), completou a súa formación cun Diploma en Xestión de Ciclo de Vida na University of Surrey (2006). Tras períodos posdoutorais no Reino Unido e en Suecia, consolidou a súa carreira como docente e investigadora na USC. A súa investigación céntrase na integración do Pensamento de Ciclo de Vida como ferramenta para a toma de decisións, mediante o desenvolvemento e aplicación de metodoloxías de avaliación. Destaca o seu traballo no ciclo urbano da auga, onde coordinou un proxecto europeo que deu lugar á metodoloxía estandarizada CEN/TR 17614 para avaliar a eficiencia enerxética en estacións de depuración de augas residuais; e no sector alimentario, con traballos e investigacións tanto a nivel de produto como a nivel sectorial e territorial. Na actualidade a súa investigación focalízase no apoio a tecnoloxías emerxentes mediante o desenvolvemento e emprego de ferramentas prospectivas nas etapas iniciais do deseño de procesos con liderado e participación en proxectos nacionais e internacionais. Publicou máis de 95 artigos con revisión por pares (93% en Q1, índice H = 45), 16 capítulos de libro e foi editora de dous volumes. Presentou máis de 130 comunicacións en congresos internacionais e ten dirixido unha decena de teses de doutoramento e máis de 30 de TFM e TFG. No eido da xestión universitaria, foi coordinadora de relacións internacionais (2013-2014) e Vicerreitora de Internacionalización (2015-2018), impulsando o I Plan Estratéxico de Internacionalización da USC. Desde 2023 é Coordinadora Académica do Grao en Enxeñaría Química, e participa activamente en programas de mentoría científica tanto dentro da USC (CRETUS e EDIUS) como fóra dela (IMDEA Energía).