JULIA MARIA
CRESPO COMESAÑA

A súa actividade profesional iníciase en 1989 na Administración Autonómica en labores de supervisión das actividades de atención ao alumnado e elaboración e implementación de programas educativos nos centros de Educación Infantil pertencentes á Xunta de Galicia, así como na avaliación de competencias adquiridas polos profesionais destes centros para a súa adaptación aos requisitos da LOGSE. En 1992 comeza a traballar no Concello de Vigo na elaboración de programas para Casas de Oficios. A partir dese ano comeza a súa actividade docente en institucións de educación superior: Universidade de Vigo, Santiago de Compostela e UNED. Os primeiros anos na Universidade de Vigo e a UNED están centrados na formación docente e na planificación metodolóxica innovadora das diferentes materias. Coa súa afiliación á Universidade de Santiago de Compostela comeza unha etapa específica que tenta combinar a docencia en materias afíns á organización escolar (Organización do Centro Escolar, Practicum, Organización e Xestión do Centro Escolar, Xestión e Desenvolvemento Institucional de Centros Educativos, entre outras) e a investigación en temáticas como o espazo educativo, as problemáticas na inclusión do alumnado inmigrante e a participación da familia na educación dos seus fillos e fillas. Sobre estas liñas de investigación desenvolvéronse a maioría dos artigos, capítulos de libros, comunicacións a congresos ou conferencias realizados. Nesta liña destaca tamén a transferencia de coñecemento na realización de informes técnicos sobre a adecuación dos espazos, como o realizado sobre o CEIP Ramón e Cajal ou o informe de idoneidade do emprazamento dun centro de terceira idade. Así mesmo, as temáticas traballadas sobre a inclusión do alumnado inmigrante están a contribuír á mellora e innovación en diferentes contextos escolares co fin de potenciar unha visión da diversidade étnico-cultural como un valor formativo fundamental. Desde a súa incorporación á USC, en 2005, pertence ao Grupo de Investigación ESCULCA (Grupo de Referencia Competitiva do Sistema Galego de I+D+i), que está integrado na Rede RIES, formada por oito grupos de investigación das tres universidades do SUG, e que adquiriu unha gran proxección social. O grupo de investigación recibiu o 1er Premio Nacional de Investigación Educativa 2007 co proxecto "Familias inmigrantes en Galicia: a dimensión socioeducativa da integración", e o Premio María Barbeito de Educación en Galicia á Investigación Pedagóxica 2012 (3ª edición) polo traballo "O rendemento escolar do alumnado procedente da inmigración en Galicia. Un programa de optimización para familias e centros de ensino". O labor investigador compleméntase cun compoñente práctico moi importante, xa que posúe unha proxección nos procesos de innovación, cambio e mellora dos centros escolares. Actualmente é secretaria do departamento de Pedagoxía e Didáctica da Facultade de Ciencias da Educación da USC e Coordinadora da área de Didáctica e Organización Escolar.