Materiais moleculares de lantanoides como imáns e termómetros luminescentes

Resumo

A presente tese céntrase na obtención de materiais moleculares bifuncionais de lantanoides que se poidan comportar como moléculas imán (SMMs) e termómetros luminescentes. Con este propósito, explorouse a síntese de complexos de ións oblato con xeometrías fortemente axiais, como a bipirámide pentagonal ou hexagonal, co obxectivo principal de obter SMMs estables ao aire, con elevada barreira enerxética para a inversión do spin (Uef), alta temperatura de bloqueo (TB) e luminescencia sensible á temperatura. Deste xeito, estes materiais poderían ter aplicacións en dispositivos de almacenamento de datos, coa vantaxe adicional de monitorizar en tempo real a temperatura do nanodispositivo magnético. Para alcanzar este obxectivo, usáronse ligandos capaces de mellorar a estabilidade e anisotropía dos complexos, e de potenciar o efecto antena para intensificar a luminescencia.